Nkrê un Son más Son...

segunda-feira, dezembro 10, 2007

RAP DI KASU-BODI!



Recebi este protesto do José Luis Tavares perante as denúncias de violencia na cidade.

Nha genti kel li é kusé?,
fladu é kasu-bodi
nhu rai na si pagodi
mondon na si xalé

Di noti dj'e bira lei
pa tudu kantu sidadi
ta kasa sen piadadi
sen vistu nen okei

Es trena la pa steiti
na stilu faruesti
madjadu ku kaseti
k'é kura k'es sta meste

Si kel li é molestra
dja lastra na txon di téra
nu dexa di palestra
nu arma nu ba géra

Matxadu ku pistola
fakon punhal nabadja
pa nu nxina kanadja
ba studa otu skola

Kô fika mô dongoli
aspradu dentu braku
ka bu da pa moli
mas fla-s ma bô é nhaku

Fladu ti pulísia
dja kanba baxu meza
sukuru ku malísia
dja bira morabeza

Dotoradus na krimi
ta dadu nobu skola
si es é bon pa filmi
nós é xou di bola

Direitus umanu
ka só pa tugs nau
tanbé é pa nhu beltranu
k'es dexa sen kakau

N ka juis pa N julga-s
nen santu pa N purdua-s
so N kré nha liberdadi
pa N anda na sidadi

Alvés pa bu ten pás
bu ten ki faze géra
nu ten ki ser kapás
di konbate-s un-séra

Iletra ku si apagon
sta djuda es mau ason
si N txoma-l kafuketa
é liberdadi pueta

Nu sende nós txabeta
nu bonbia nós korneta
nu manda-s da otu boita
ku lei ô ku raboita


JOSÉ LUIZ TAVARES

Sem comentários:

Follow Us @soratemplates