Nkrê un Son más Son...

quarta-feira, julho 04, 2007

Adeus letra C!

Son di Santiagu recebi es puema di Marcianu Moreira nes momentu di celebrason di independencia...Nta ta agradeci bu participason nes blog!




Si bo e Ateniensi
purgunta Kaka
nau, e Rumanu
teima Seza

Di pes djuntu
tudu jura
ma na Sidadi Velha
di boka raganhadu
senpri pa ladu direitu
diretamenti di Lisboa
bu dizenbarka

Pertu di bo
pasu a pasu
Kaka ku Seza, Xepa ku Txuka i otus mininu
diskunfiadu si
txiga

Ku spiritu di anju
es txiga
cha che chi cho chu
es staba ta kanta
xa xe xi xo xu
era rifron

Un truvon
di bu bokona spanta-s:
da César kel ki e di César!
i di sel e kumanda:
kuandu cha ta skrebedu xa
sima chato ta toma xarope
xe ta labradu che
sima xeque sen cheque
chi ta rabiskadu xi
sima chiça ti ki kai xícara
xo ta santadu cho
sima xogum ki bira chofer
chu ta letradu xu
sima chulé di xucro

Un palmatoria
bu abokanha-s
trokadu centro pa sentro
di etymon centru ben kel la
kel li ka ben di Roma ki fari di latin

Un borduada
bu morde-s
pabia sinto pa cinto
primeru e pa kurason
ultimu pa kalsa

Ti kai - duedjus na kaskadju
bu sopra-s
pa es podi ten tenpu dikora
ma conselho i concelho
ultimu ten Autoridadi
i kel otu e so pa laraxadus

Oredjas buru
na di ses
ku denti bu prega
tudu pamodi maça pa massa
kel li e pa Italianus
kel la pa burus

Oredja buru go nau!
es grita fepu
ku fantasma etimolujia
(moradu la pa ladu Roma nhu Sezar
nen retratu ka manda)
nos mimoria e ka kontratadu

Muitu menus mimorias
di kes ku nasimentu markadu na Nosu Sinhor Futuru
i di kes fora di luzofunia diasporizadu
- nen tradison di uza alfabetu Don Dinis Pueta ka ten

Nos mimoria
e pa kimika ku orason
primeru ta da-nu grogu
sigundu, lugar na seu

Dentu kel un spertinhu
(António de Paula Brito
nhu padri santa-l)
djata
minis:
nu mara-l bokona
ku Serpenti di Afrika S
nu ntrega-l
Kapiton di Europa K
rumu Lisboa
na ragas di si primu Q
afinal,
kabesa di Afrika ku Europa nu erda

I ku djatu Xepa ku Txuka rispondi:
bu skesi si maridu CH i fidju TCH
kabesa dentu mar nu manda-s
pa es ka sukuta
ma nes kutelu so ta kantadu
xa xe xi xo xu, sima xutu na ku
di xatu ku si xaropi
di xeki sen xeki
di xisa kel xikra
di xogun ki bira xofer
di xukru ku xule
i txa txe txi txo txu, di txupa limon
na txeia txabeta nos kretxeu
na txoru matxikadu ses skrita kalapitxadu

90 i tal anu dipos
Kulokiu di Mindelu riforsa:
talves so pa skrebi si barbitxi
sinon, nen rabu Ç ka ta fika

15 anu dipos
Grupu di Padronizason prupoi:
C e pa bai!
ku primu, maridu i fidju
ku rabu tanbe
i fantasma etimolujia ta kunpanha-s

Karlus Magnu fla Amen
dipos di 4 anu ta matuta
i Benson Son Juse ki da
oranu pasadu, dipos di 7 anu ta sumara

N ta sana-bu oji
22 sol dipos di dia di mintira
i di Verdadi 2007 anu dipos
na Sentenariu nhu Baltas i Jerason Finka Pe na Tera
bespa Sakramentu bu partida
sakedu na txon di portu Sidadi Velha
Bersu Di Nos Tudu

Di Marsianu nha Ida padri Nikulau Ferera

1 comentário:

Marciano Ramos Moreira disse...

N ta agradesi Djinho pa publikason di es djatu a favor di libertason di nos disendentis di kanga di etimolujia.

Es debi skrebi nos lingua sima es ta le i le sima es ta skrebi - sen kansera di dikora modi ta skrebedu ninhun palavra!

Follow Us @soratemplates